കിവീസിനെ എറിഞ്ഞു വീഴ്ത്തി വാഷിംഗ്ടൺ; അടിച്ചുകയറിയത് ജഡേജയുടെ റെക്കോർഡിനൊപ്പം

ഇന്ത്യ-ന്യൂസിലാൻഡ് രണ്ടാം ടെസ്റ്റ് മത്സരത്തിലെ ആദ്യദിവസം അവസാനിച്ചു. ആദ്യദിനത്തിൽ ന്യൂസിലാൻഡ് 259 റൺസിന് പുറത്തായി. ഒന്നാം ഇന്നിംഗ്സിൽ ഇന്ത്യൻ സ്പിന്നർമാർ മികച്ച പ്രകടനം നടത്തിയപ്പോൾ ന്യൂസിലാൻഡ് താരങ്ങൾ പുറത്താവുകയായിരുന്നു.

 ഇന്ത്യൻ ബൗളിംഗ് നിരയിൽ വാഷിംഗ്ടൺ സുന്ദർ ഏഴ് വിക്കറ്റുകൾ വീഴ്ത്തി തകർപ്പൻ ബൗളിംഗ് ആണ് കാഴ്ചവെച്ചത്. ഇതിൽ അഞ്ചു വിക്കറ്റുകളും ബൗൾഡാക്കികൊണ്ടാണ് താരം സ്വന്തമാക്കിയത്. ഇതോടെ ഒരു നേട്ടവും വാഷിംഗ്ടൺ സുന്ദർ സ്വന്തമാക്കി. 

 ടെസ്റ്റ് ക്രിക്കറ്റിൽ ഇന്ത്യയ്ക്കായി ഒരു ഇന്നിംഗ്സിൽ ഏറ്റവും കൂടുതൽ ബൗൾഡ് വിക്കറ്റുകൾ സ്വന്തമാക്കുന്ന താരമായാണ് വാഷിംഗ്ടൺ മാറിയത്. ഇത്ര തവണ എതിരാളികളെ ബൗൾഡ് വിക്കറ്റുകൾ ആക്കിയ രവീന്ദ്ര ജഡേജയുടെ റെക്കോർഡിനൊപ്പം എത്താനാണ് വാഷിംഗ്ടണിന് സാധിച്ചത്. 2023ൽ നടന്ന മത്സരത്തിൽ ഓസ്ട്രേലിയക്കെതിരെയാണ് ജഡേജ ഈ നേട്ടം സ്വന്തമാക്കിയത്.

 ഏഴു വിക്കറ്റുകൾ നേടിയ വാഷിംഗ്ടൺ സുന്ദറിന് പുറമേ മൂന്നു വിക്കറ്റുകൾ നേടി രവിചന്ദ്രൻ അശ്വിനും തിളങ്ങി. 

 ന്യൂസിലാൻഡ് ബാറ്റിംഗിൽ രചിൻ രവീന്ദ്ര, കോൺവെ എന്നിവർ അർദ്ധ സെഞ്ച്വറി നേടി. കോൺവെ 141 പന്തിൽ 76 റൺസ് നേടി. പതിനൊന്നു ഫോറുകളാണ് താരം നേടിയത്. 105 പന്തിൽ 65 റൺസ് ആണ് രവീന്ദ്ര നേടിയത്. 5 ഫോറുകളും ഒരു സിക്സും അടങ്ങുന്നതാണ് താരത്തിന്റെ ഇന്നിംഗ്സ്.